សួស្តីប្រិយមិត្តជាទីគោរពស្រលាញ់របស់ ផ្កាស្លា ផាតនើ! ជារៀងរាល់សប្តាហ៍ ទំព័រកម្សាន្ត តែងតែនាំមកជូនប្រិយមិត្តអ្នកអាននូវព័ត៌មានកម្សាន្តពីតំបន់ទេសចរណ៍នានា។ ថ្ងៃនេះ អេដមីនទន្សាយ សូមនាំប្រិយមិត្តមកដឹងពីទំនៀមទម្លាប់ ៥យ៉ាង របស់ប្រជាជនមីយ៉ាន់ម៉ា ដែលយើងគួរដឹងមុនទៅលេងប្រទេសមីយ៉ាន់ម៉ា… ចង់ដឹងថាមានអ្វីខ្លះ សូមចូលរួមអានទាំងអស់គ្នាជាមួយ អេដមីន។
១. កុំប៉ះកាន់ក្បាលនរណាម្នាក់
មីយ៉ាន់ម៉ា ឬយើងអាចហៅម្យ៉ាងទៀតថាប្រទេសភូមា។ អាស្រ័យដោយមានក្រុមជនជាតិភាគតិចជាច្រើន និងគុណតម្លៃប្រពៃណីដ៏រឹងមាំរបស់ជនជាតិភាគតិចទាំងនោះ ទើបអាចធ្វើឲ្យប្រទេសភូមា ក្លាយជាប្រទេសដ៏គួរឱ្យចាប់អារម្មណ៍មួយនៅក្នុងបណ្តាប្រទេសតំបន់អាស៊ីអាគ្នេយ៍នាពេលបច្ចុប្បន្ននេះ។
មិនថាទៅទីណានោះទេ យើងនឹងឃើញបុរសៗស្លៀកសារុងដូចជា ឡុងយី ហើយកំពុងទំពារគ្រាប់អ្វីម្យ៉ាង ហើយក៏នឹងឃើញស្ត្រីដែលមានមុខមាត់ញញឹម ព្រមទាំងលោកយាយដែលកំពុងជក់បារីជាដើម ហើយវាក៏ជាតម្រុយតំណាងឲ្យវប្បធម៌របស់ជនជាតិនេះ។
ឥលូវនេះយើងមកដឹងពីទំនៀមទម្លាប់ នៃការយកដៃទៅប៉ះក្បាលនរណាម្នាក់ : ការនេះវាត្រូវបានគេចាត់ទុកថាជាការមិនគោរព ឬម៉ាក់ងាយ។ ក្បាលត្រូវបានគេចាត់ទុកថាជាផ្នែកអវៈយវៈដ៏ពិសិដ្ឋបំផុតនៃរាងកាយរបស់មនុស្ស។ ដោយសារតែបែបនេះហើយទើបការប៉ះក្បាលនរណាម្នាក់ គឺបញ្ជាក់ថាយើងមានចរិត និងសីលធម៌មិនល្អ។ ទោះបីជាយើងប្រព្រឹត្តក្នុងលក្ខណៈរួសរាយរាក់ទាក់ ឬស្រឡាញ់ក៏ដោយ។ រឿងនេះក៏មានអ្នកខ្លះចាត់ទុកថាវាមិនអីដែរ ក្នុងការប៉ះក្បាលកុមារ ប៉ុន្តែដើម្បីសុវត្ថិភាព ឬមានបញ្ហាកើតឡើង យើងគួរជៀសវាងការប៉ះផ្នែកនេះនៃរាងកាយ មិនថាមនុស្សអាយុប៉ុន្មានឡើយ។
២. ការពាក់ស្បែកជើងនៅវត្ត ឬក្នុងបរិវេនប្រាសាទនានា
សម្រាប់ភ្ញៀវអន្តរជាតិដែលចូលវត្តអារាម ឬប្រាសាទបុរាណនានា យើងគួរដោះស្បែកជើង រួមទាំងស្រោមជើងចេញ មុនពេលចូលរួម (ប្រភេទស្បែកជើងបែបណាក៏ដោយ)។ នៅពេលដែលប្រទេសនេះស្ថិតនៅក្រោមការគ្រប់គ្រងរបស់ប្រទេសអង់គ្លេស ភាពចលាចលបានកើតឡើងបន្ទាប់ពីពួកគេត្រូវបានអនុញ្ញាតឲ្យពាក់ស្បែកជើងចូលទីវត្ត ឬប្រាសាទ និងកន្លែងពិធីសាសនាទាំងនេះ។ បន្ទាប់ពីទទួលបានទាឯករាជ្យពេញលេញ រឿងនេះត្រូវបានប្រជាជនបន្តអនុវត្តសារជាថ្មីឡើងវិញ ហើយស្បែកជើងទាំងអស់នឹងត្រូវដកចេញមុនពេលចូលទៅក្នុងទីកន្លែងទាំងនោះ។ ប្រជាជនមីយ៉ាន់ម៉ា កាន់សាសនាច្រើន ហើយប្រកាន់យកជំនឿព្រះពុទ្ធសាសនារបស់ពួកគេយ៉ាងធ្ងន់ធ្ងរបំផុត ចំពោះការមិនគោរពច្បាប់ទាំងនេះ នឹងត្រូវបានចាត់ទុកថាជារឿងមិនសមហេតុផល ហើយអាចនឹងទទួលទោសទណ្ឌទៀតផង។ ប្រសិនបើយើងមិនច្បាស់ថា ពួកគេត្រូវដោះស្បែកជើងនៅកន្លែងណាទេ ដោយសារខ្វះការណែនាំច្បាស់លាស់ យើងគួរដោះស្បែកជើងចេញទុកនៅកន្លែងណាមួយដែលសមស្រប និងសុវត្ថិភាព។
៣. ការជប់លាងនៅទីគោរពសក្ការៈ ឬប្រាសាទនានា
ការជប់លាងនៅទីគោរពសក្ការៈ ឬប្រាសាទនានា ត្រូវបានហាមឃាត់ជាដាច់ខាត ព្រោះទង្វើនេះត្រូវបានប្រជាជនមីយ៉ាន់ម៉ា យល់ថាមិនសមរម្យ និងជាការមិនគោរពដល់ទីសក្ការៈគោរពសាសនារបស់គេ។ វាជាការខុសច្បាប់សម្រាប់នរណាម្នាក់ក្នុងការជួបជុំបង្កើតកម្មវិធីជប់លៀង ឬផឹកស្រាសប្បាយនៅលើវត្ត ប្រាសាទ ឬទីសក្ការៈគោរពសាសនាផ្សេងៗទៀត ក្នុងប្រទេសមីយ៉ាន់ម៉ា។ អ្នកទស្សនាគួរដឹងពីបំរាមទាំងនេះឲ្យបានច្បាស់លាស់ ជៀសវាងការទទួលបាននូវការណែនាំ ឬពិន័យរបស់ច្បាប់ប្រទេសនេះ។
៤. កុំស្នាក់នៅសណ្ឋាគារដែលមិនបានចុះឈ្មោះ
ភ្ញៀវទេសចរអន្តរជាតិ ដែលចង់ទៅទស្សនាប្រទេសមីយ៉ាន់ម៉ា នោះយើងនឹងឃើញថាពាក្យសុំទិដ្ឋាការតម្រូវឱ្យអ្នកទេសចរបំពេញអាសយដ្ឋានសណ្ឋាគារ ឬផ្ទះសំណាក់ដែលខ្លួនបាន់កក់ទុក នេះគឺដោយសារតែជម្រើសនៃការស្នាក់នៅទាំងអស់ត្រូវតែមានការយល់ព្រមអនុញ្ញាតពីក្រសួងទេសចរណ៍របស់ភូមា។
យើងត្រូវប្រាកដថា បានកក់ទុកកន្លែងស្នាក់ជាមុន ដោយសារបញ្ហាតម្លៃនៅតែមានទំនោរកើនឡើងតាមរដូវកាល ដោយមូលហេតុមានភ្ញៀវបន្តធ្វើដំណើរមកទស្សនាប្រទេសមីយ៉ាន់ម៉ា (ភូមា) កាន់តែច្រើនឡើងៗ ហើយបញ្ហាបន្ទប់ស្នាក់ ជាញឹកញាប់ក៏អាចខ្វះខាតផងដែរ។
៥. ជៀសវាងការប្រើ (សម) ដើម្បីញ៉ាំអាហារ
ទំនៀមទម្លាប់នៃការប្រើ សម និងស្លាបព្រា មានសារៈសំខាន់ចាំបាច់ណាស់សម្រាប់ការបរិភោគអាហារនៅប្រទេសមីយ៉ាន់ម៉ា ដែលយើងត្រូវដឹង។ អាហារត្រូវបានរៀបចំអមដោយស្លាបព្រានៅខាងក្រោមស្រាប់ (ដោយពុំមានភ្ជាប់ សម មកជាមួយឡើយ) ហើយជំនួសដោយការប្រើកាំបិតវិញ ព្រោះនៅទីនោះ ពួកគេប្រើស្ទើរនៅទូទាំងប្រទេសទៅហើយ។ ទោះបីជាការហូប មី ឬលតឆា ឬបន្លែក្តី ពួកគេមិនមានទម្លាប់ប្រើ សម ដូចនៅក្នុងប្រទេសលោកខាងលិច ឬអាស៊ីមួយចំនួននោះទេ ទោះយ៉ាងណាក៏ដោយក្នុងករណីខ្លះ យើងក៏អាចស្នើសុំប្រើ សម ដើម្បីអាចទទួលទានអាហារបានស្រួលដូចជា ៖ លតឆា សាច់ក្រក…។
ក្រុមការងារយើងខ្ញុំ សូមមេត្តាអធ្យាស្រ័យ ចំពោះរាល់កំហុសឆ្គងដែលកើតមាន ទាំងអត្ថន័យ អក្ខរាវិរុទ្ធ និងកង្វះខាតព័ត៌មានលម្អិតផ្សេងៗ… ហើយក៏សូមទទួលយកនូវមតិរិះគន់ ឬយោបល់កែតម្រូវផ្សេងៗរបស់លោកអ្នក ដោយក្តីគោរព និងរាប់អានបំផុត។
សូមអរគុណ!!!
ដកស្រង់អត្ថបទដោយ ៖ ស្រូវ
