+សំណួរទី១៩២ :
មានពុទ្ធសុភាសិតមួយឃ្លាពោលថា “កាប់ឈើ៣ រក្សាព្រៃ១០ ផឹកថ្នាំ៥កញ្ចប់ តមត្រណម២”។ តើមានន័យសេចក្តីថាយ៉ាងដូចម្ដេចខ្លះ?
-ចម្លើយទី១៩២ :
បកស្រាយពុទ្ធសុភាសិត ៖
-កាប់ឈើ៣មានន័យថា នៅក្នុងខ្លួនមនុស្សមានអាក្រក់៣សំខាន់ៗ គឺ
- លោភៈ សេចក្តីជំពាក់ចិត្ត សេចក្តីប្រាថ្នា បំណងចង់បាន។
- ទោសៈ ការប្រទូស្ត កំហឹង សម្អប់ កំហុស។
- មោហៈ អវិជ្ជា សេចក្តីវង្វេង សេចក្តីល្ងង់ ឬភ័ន្ត ស្មារតីមិនយល់ការណ៍ពិត, មិនស្គាល់ខុសត្រូវ។
-រក្សាព្រៃ១០ មានន័យថា មនុស្សដែលកើតបានមកជាមនុស្ស គឺបានសន្សំបុណ្យ កុសល យ៉ាងច្រើនសម្រាប់ពេលខាងមុខតទៀត ការរក្សាព្រៃ១០ សម្ដៅលើ ៖
កាយកម្ម៣ ៖
- មិនសម្លាប់សត្វ មនុស្ស
- មិនលួចទ្រព្យអ្នកដទៃ
- មិនប្រព្រឹត្តខុសក្នុងកាមទាំងឡាយ។
វចីកម្ម៤ ៖
- មិននិយាយពាក្យកុហក
- មិននិយាយពាក្យញុះញង់
- មិននិយាយពាក្យទ្រគោះ
- មិននិយាយពាក្យឥតប្រយោជន៍។
មនោកម្ម៣ ៖
- មិនសម្លឹងរំពៃចង់បានទ្រព្យអ្នកដទៃ
- មិនគិតបំផ្លាញអ្នកដទ
- គំនិតយល់ឃើញត្រូវតាមគន្លងធម៌។
-ផឹកថ្នាំ៥កញ្ចប់ មានន័យថា មនុស្សកើតមក ត្រូវចេះរក្សាខ្លួនឲ្យបានត្រឹមត្រូវ ការបើនៅលីវ ឬប្រសិនបើមានគ្រួសារក៏ដោយ ត្រូវចេះមានសីល៥ ជាប្រចាំកាយ ដែលរួមមាន ៖
- បាណាតិបាតា កិរិយាវៀរចាកការសម្លាប់ជីវិតមនុស្ស សត្វ។
- អទិន្នាទានា កិរិយាវៀរចាកការលួចទ្រព្យសម្បត្តិអ្នកដទៃ។
- កាមេសុ កិរិយាវៀរចាកការសេពមេថុនធម្ម កាមតណ្ហា។
- មុសាវាទា កិរិយាវៀរចាកការពោលពាក្យកុហក មុសា។
- សុរាមេរ័យ កិរិយាវៀរចាកការផឹកសុរា និងមេរ័យ។
-តមត្រណម២ មានន័យថា មនុស្សកើតមកធំដឹងក្តី តែងតែបានប្រព្រឹត្តនូវអំពើអកុសលកម្មជាដើម។ តែមនុស្សត្រូវចេះតម គឺ ៖
- អំពើបាប ដែលលាមក ពុំប្រសើរ ចិត្តបាប អំពើបាប។
- អំពើអកុសល សេចក្តីអាក្រក់ បាប អពមង្គល អកុសលតាមមកផ្តល់ គឺបាបតាមមកផ្តល់ បាបចេញមុខឲ្យផល។
ក្រុមការងារយើងខ្ញុំ សូមមេត្តាអធ្យាស្រ័យ ចំពោះរាល់កំហុសឆ្គងដែលកើតមាន ទាំងអត្ថន័យ អក្ខរាវិរុទ្ធ និងកង្វះខាតព័ត៌មានលម្អិតផ្សេងៗ… ហើយក៏សូមទទួលយកនូវមតិរិះគន់ ឬយោបល់កែតម្រូវផ្សេងៗរបស់លោកអ្នក ដោយក្តីគោរព និងរាប់អានបំផុត។
សូមអរគុណ!!!
ដកស្រង់ពីសៀវភៅវប្បធម៌ទូទៅដោយ ៖ ស្រូវ