ថ្ងៃនេះផ្កាស្លា ផាតនើ (Phkasla Partner) សូមលើកយកនូវ មហាសមុទ្រណាខ្លះដែលមានជម្រៅជ្រៅជាងគេ មកជូនប្រិយមិត្តអានកម្សាន្តទាំងអស់គ្នា! ចង់ដឹងថាមានអ្វីខ្លះ សូមប្រិយមិត្តចូលរួមអាន អត្ថបទខាងក្រោម៖
១-មហាសមុទ្រប៉ាស៊ីហ្វិក (Pacific)
មហាសមុទ្រជ្រៅជាងគេលេខ1 ដែលមានជម្រៅជាមធ្យម 4,280ម៉ែត្រ និងជម្រៅអតិបរមាចន្លោះ 10,911-11,035ម៉ែត្រ។ កន្លែងជ្រៅបំផុតប្រចាំមហាសមុទ្រនេះ និងប្រចាំផ្ទៃផែនដីទាំងមូល គឺហៅថា ចំណុចឆាលែនចឺឌីប (Challenger Deep) នៃអន្លង់ម៉ារីយ៉ាណា (Mariana Trench) នៅតំបន់ប៉ាស៊ីហ្វិកខាងលិចក្បែរកោះហ្កាំ។
២-មហាសមុទ្រអាត្លង់ទិច (Atlantic Ocean)
ជាមហាសមុទ្រជ្រៅជាងគេបំផុតទី២លើពិភពលោក។ វាមានជម្រៅគិតជាមធ្យម 3,646ម៉ែត្រ និងជម្រៅគិតជាអតិបរមា 8,376ម៉ែត្រ។ អន្លង់ព័រតូរីកូ (Puerto Rico Trench) ដែលស្ថិតនៅក្បែរសមុទ្រការីបង់ (Caribbean Sea) គឺជាចំណុចជ្រៅបំផុតរបស់មហាសមុទ្រអាត្លង់ទិច។
៣-មហាសមុទ្រឥណ្ឌា (Indian Ocean)
មានជម្រៅជាមធ្យម 3,741ម៉ែត្រ និងជម្រៅអតិបរមា 7,258ម៉ែត្រ ដែលនាំឲ្យវាជាប់ជាមហាសមុទ្រជ្រៅបំផុតលំដាប់ថ្នាក់លេខ3។ កន្លែងជ្រៅបំផុតប្រចាំមហាសមុទ្រឥណ្ឌាគឺអន្លង់ជ្វា (Java Trench) ដែលស្ថិតនៅក្បែរកោះស៊ូម៉ាត្រានៃប្រទេសឥណ្ឌូណេស៊ី។
៤-មហាសមុទ្រភាគខាងត្បូង (Southern Ocean)
ដែលនៅព័ទ្ធជុំវិញទ្វីបអង់តាក់ទិចនៃប៉ូលខាងត្បូង គឺជាមហាសមុទ្រជ្រៅបំផុតចំណាត់ថ្នាក់ទី4 ដែលមានជម្រៅជាមធ្យម 3,270ម៉ែត្រ និងជម្រៅអតិបរមា 7,236ម៉ែត្រ។ អន្លង់សេនវិចខាងត្បូង (South Sandwich Trench) គឺជាកន្លែងជ្រៅបំផុតរបស់មហាសមុទ្រនេះ។
៥-មហាសមុទ្រទឹកកកអាក់តិច (Arctic Ocean)
ក្នុងចំណោមមហាសមុទ្រទាំង5 ដែលស្ថិតនៅប៉ូលខាងជើង គឺជាសមុទ្រដែលតូច ហើយរាក់ជាងគេបង្អស់។ វាមានជម្រៅជាមធ្យម 1,204ម៉ែត្រ និងជាជម្រៅអតិបរមា5,450ម៉ែត្រ។ កន្លែងជ្រៅបំផុតរបស់វាគឺចំណុចម៉ូល្លីឌីប (Molly Deep) ស្ថិតនៅច្រកសមុទ្រហ្វ្រាម (Fram Strait) ក្បែរកោះហ្គ្រីនលែន (Greenland)។
ក្រុមការងារយើងខ្ញុំ សូមមេត្តាអធ្យាស្រ័យ ចំពោះរាល់កំហុសឆ្គងដែលកើតមាន ទាំងអត្ថន័យ អក្ខរាវិរុទ្ធ និងកង្វះខាតព័ត៌មានលម្អិតផ្សេងៗ… ហើយក៏សូមទទួលយកនូវមតិរិះគន់ ឬយោបល់កែតម្រូវផ្សេងៗរបស់លោកអ្នក ដោយក្តីគោរព និងរាប់អានបំផុត។
សូមអរគុណ!!!
អត្ថបទដកស្រង់ដោយ ៖ ទន្សាយ (ភ្នំ)
